"Украина енді жоқ": Трамп АҚШ-қа келген Зеленскийді сынға алды

Президенттікке үміткер Дональд Трамп Украинаның жеңіске жетуі екіталай екенін айтты. Ал Өкілдер палатасының спикері Майк Джонсон Зеленскийдің Пенсильванияға сапарына байланысты Украинаның АҚШ-тағы елшісін қызметінен босатуды талап етті.

Зеленскийдің сапарынан кейін президент Джо Байден Украинаға жаңа әскери көмек ретінде 7,9 миллиард доллар бөлетінін жариялады. Сонымен қатар Украина біріккен тірек қаруының планер бомбаларын, Patriot әуе қорғаныс жүйесінің тағы бір батареясын және қосымша зымырандар алады. АҚШ, сонымен қатар, украиналық ұшқыштарды F-16 жойғыштарын басқаруға үйрету бағдарламасын енгізеді.

Жаңа пакеттен 5,5 миллиард доллар 30 қыркүйекке дейін бөлінуі керек.

Кейін Зеленский Ақүйге демократиялық партиядан үміткер АҚШ вице-президенті Камала Харриспен де кездесті.

Ол өзімен бірге Украинаның "Жеңіс жоспары" құжатын алып келді. Құжаттың мазмұны әлі жарияланған жоқ, оның тек төрт тармақтан тұратыны белгілі: Украинаға әскери көмек, экономикалық қадамдар, агрессорға дипломатиялық қысым және "Ресейдің саяси мәжбүрлеуі".

Байден әкімшілігінің бірнеше жоғары лауазымды шенеуніктері "Жеңіс жоспарымен" жалпы танысып, оның мазмұнына көңілі толмады.

Ақүй шенеуніктері бұл жоспарда көбірек қару-жарақпен қамтамасыз ету және америкалық зымырандарды Ресейдегі нысанаға қарсы қолдану сынды ұсыныстардың жан-жақты стратегиясы жоқ деп алаңдайды.

Бір күн бұрын АҚШ президенттігіне республикалық партиядан үміткер Дональд Трамп Зеленскийге мысқылмен оны планетаның ең ұлы кәсіпкері деп атады. 

"Украина жоқ. Бұл енді Украина емес. Үйлер қирады, қалалар жойылды. Олар енді жоқ. Біз келіссөздерден бас тартқан Зеленскийге миллиондаған доллар беруді жалғастырып жатырмыз. Ол біздің елге келген сайын 60 миллиард доллар алып қайтады", – деді Трамп.

Бұрын да Трамп Украинаның "жойылғаны" және соғыс кезінде "миллиондаған" адам қаза тапқаны туралы осындай мәлімдемелерді бірнеше рет айтқан.

Зеленскийдің Вашингтондағы жеке кездесулері әрқашан сәтті болмайды. Өткен жылдың желтоқсанында бұрын бөлінген қаражат жұмсалып, америкалық әскери техникалар берілмей, Зеленский бос қайтты.

Трамп Ресей әскерінің мықтылығын атап өтті.

"Байден "Жеңгенше кетпейміз" дейді. Бірақ Ресей жеңіп кетсе не болады? Олар соғысып үйреніп қалған. Олар Гитлерді жеңді, Наполеонды жеңді. Олар үнемі соғысады. Және бұл өте жаман", – деді Трамп.

Дональд Трамп тағы Зеленскиймен кездесуге ниетті екенін мәлімдеді.

Зеленскийдің Америка Құрама Штаттарына сапары алдында оның Байден, Харрис және Трамппен кездесетіні белгілі болды. Байден және Харриспен кездесулер өтті, бірақ Трамппен кездеспеді.

Зеленскийдің АҚШ-қа сапары кезінде оның республикалық партия басшылығымен қарым-қатынасын күрт бұзған жанжал шықты.

Өкілдер палатасының спикері республикашыл Майк Джонсон Зеленскийден Украинаның АҚШ-тағы елшісі Оксана Маркарованы шығаруды қатаң талап етті.

Джонсонның айтуынша, ол Зеленскийдің Пенсильвания штатында Скрантон қаласындағы оқ-дәрі зауытына барған, бұл – республикашыл спикердің айтуынша, АҚШ-тағы сайлау науқанына араласу.

"Мен сізден Украинаның АҚШ-тағы елшісі Оксана Маркарованы дереу жұмыстан босатуыңызды талап етемін", – деп жазды спикер.

Осы аптаның басында Зеленский Скрантондағы украиналық әскерге қажет 155 мм калибрлі снарядтарға арналған металл қаптамаларды шығаратын әскери зауытқа барды.

Скрантон – президент Джо Байденнің туған қаласы, ал Пенсильвания қарашадағы президенттік сайлауды шешетін негізгі штаттардың бірі.

Көптеген республикашылар Зеленскийдің сапарын демократтар үшін сайлау науқаны және сайлауға араласу ретінде қабылдады. Украина президентінің өзі Украина үшін өмірлік маңызы бар оқ-дәрі шығаратын адамдарға алғыс айтқысы келетінін айтты.