Қазақстанда АЭС салуға қатысты референдум өте ме?

Энергетика министрлігінің басшысы әлеуметтік желіде АЭС салуға қатысты референдум өткізудің қажеті жоқ деген жалған ақпарат таралып жатқанын мәлімдеді. 

Энергетика министрі Алмасадам Сәтқалиев Қазақстанда атом электр станциясының құрылысы бойынша республикалық референдум өткізу мәселесіне түсініктеме берді.

Үкімет кулуарларында Энергетика министрлігінің басшысы  бұқаралық ақпарат құралдарында "министр референдум өткізу қажеті жоқ деп айтты" делінген материалдардың жалған екенін айтты.

"Бұл дұрыс емес ақпарат. Менің ойымша, бұл басылым ресми түрде кешірім сұрауы керек. Себебі мен осылай айттым: "заңнамаға сәйкес қажет емес". Бірақ халықтың ерік-жігері болғанына сүйене отырып, Мемлекет басшысының тікелей тапсырмасы бар, шешім қабылданды, біз референдум өткізумен айналысатын боламыз. Бұл тұрақты сілтемелер журналдың редакциясы мен журнал иелерінің тиісті реакциясын талап етеді. Олар маған кешірім сұрап, түзету ақпаратын беруі керек деп санаймын", – деді Алмасадам Сәтқалиев.

Алайда, ол қай БАҚ дұрыс емес ақпарат таратқанын нақты көрсетпеді.

Журналистер Энергетика министрлігі басшысының қазақстандықтардан кешірім сұрауы керек пе деп сұрады. Өйткені ол да, ведомство да станцияның құрылысы туралы нақты мәлімет бермейді.

"Мұнда процедуралар бар. Жұртшылықпен тікелей байланыс бар. Біз өңірлерге барамыз, іс жүзінде барлық өңірлерде кең ауқымды түсіндіру науқанын жүргіземіз, барлық ағымдағы сұрақтарға жауап береміз. Министрлікке референдумды жеделдету туралы бірде-бір өтініш қоғамдық бірлестіктерден де, қоғам қайраткерлерінен де болған жоқ. Сондықтан біз заңнамаға және қолданыстағы рәсімдерге сәйкес жұмыс істейміз", - деп түсіндірді Алмасадам Сәтқалиев.

Оның айтуынша, министрлік қызметкерлері тек төрт өңірге барған, алайда түсіндіру жұмыстарын барлығында жүргізу қажет.

Бұған дейін ТАСС агенттігіне берген сұхбатында Қазақстанның Ресейдегі елшісі Дәурен Абаев атом электр станциясын салу туралы референдум осы жылдың соңында өтуі мүмкін екенін мәлімдеді. Оның айтуынша, ресейлік "Росатом" корпорациясы станция құрылысының әлеуетті мердігерлерінің қатарында.