Жаңа заң: Қазақстандықтар дәрігер қатеcі үшін төлем ала алады

Өзгерістерге сәйкес, медициналық ұйымдар мен жеке медициналық практикамен айналысатын жеке тұлғалар медицина қызметкерлерінің кәсіби жауапкершілігін сақтандыруға және 14 сақтандыру ұйымын қамтитын Бірыңғай сақтандыру пулымен сақтандыру шартын жасасуға міндетті.

“Сақтандыру төлемдері дәрігерлердің байқаусызда жасалған кәсіби қателерінен зардап шеккен пациентке төленеді. Өмірі мен денсаулығына зиян келтіру фактісін растау және сақтандыру төлемін алу үшін пациентке немесе оның жақын туыстарына денсаулық сақтау субъектісіне жүгіну қажет. Медициналық қызметті жүзеге асыру нәтижесінде пациенттің өмірі мен денсаулығына зиян келтіру фактісінің болуы туралы шешімді тәуелсіз сараптама комиссиясы қабылдайды”, – делінген хабарламада. 

Пациент ТСК қорытындысының нәтижелерімен келіспеген жағдайда денсаулық сақтау министрлігінің медициналық және фармацевтикалық бақылау комитетіне немесе сотқа жүгінуге құқылы.

“Заңда сақтандыру төлемдерінің ең аз сомасы белгіленген. Ол пациентке үшінші, екінші және бірінші топтағы мүгедектік белгіленген жағдайда 500, 600, 800 АЕК болады. Тиісінше мүгедектігі бар бала 500 АЕК, өлімге әкелген зиян келтірілгені үшін 3 000 АЕК, мүгедектік белгіленбей пациенттің өмірі мен денсаулығына келтірілген зиян үшін 300 АЕК-тен аспайтын сақтандыру төлемдері төленеді. Сондай-ақ Заңда осы денсаулық сақтау субъектісі төлеген сақтандыру сыйлықақысы сомасының 5%-ынан аспайтын мөлшерде сақтандырылған медицина қызметкерлеріне адвокаттардың қызметтеріне ақы төлеуге арналған шығысты өтеу сомасы белгіленген”, – делінген ақпаратта.