• USD 468.56

  • EUR 497.56

  • RUB 7.3

  • CNY 67.18

23 Маусым, 05:44:47
Алматы
+35°

13 Қыркүйек, 2023 Барлық аймақтар

Назарбаевтар тағы не ұрлады? Жазушы сотқа берді

Назарбаев пен оның қызы плагиат үшін сотқа тартылады: автор 50 млн теңге талап етті.

Фото: ашық дерек көздерінен

"Томирис" кітабының авторы Ержан Орымбетов Алматы қалалық сотына шағым түсірді, ол Нұрсұлтан Назарбаев пен оның кіші қызы Әлия Назарбаевадан авторлық құқықты бұзғаны үшін 50 млн теңге өндіріп алуға ниетті, деп хабарлайды Qamshy.kz ақпарат агенттігі Ulysmedia.kz сайтына сілтеме жасап. 

Өз арызында Орымбетов 2013 жылы "Томирис" кітабын жазғанын және оны фильм түсіру үшін Назарбаев пен мәдениет министрлігіне ұсынғанын атап өтті.

"Назарбаев өзінің көмекшісі арқылы кітап үшін алғысын білдірді, бірақ фильм түсірілімінде қолдамады. 2017 жылдың 10 сәуірінде кенеттен Әлия Назарбаеваның өзі "Томирис" фильмін түсіріп, продюсер және сценарий авторы болатыны белгілі болды. Назарбаева мен "Қазақфильм" АҚ  арасында сценарий әзірлеуге арналған шарт қосымшада бар. Картинаға тапсырыс беруші ҚР Мәдениет министрлігі болады. 2017 жылғы 27 сәуірде президент Нұрсұлтан Назарбаев режиссер Ақан Сатаевпен кездесіп, "Томирис” фильмінің сценариі бойынша өз ұсыныстарын берді. Сонымен қатар фильмді түсірушілердің ешқайсысы мені шақырған да, сөйлескен де жоқ. Нәтижесінде "Томирис" фильмі менің қатысуымсыз түсірілді және оның тұсаукесері 2019 жылдың қыркүйегінде өтті. Бұл фильмді көргенде мен бірден плагиат екенін түсіндім. Фильмнің сюжеті, ондаған көріністері мен диалогтары менің келісімімсіз сөзбе-сөз менің кітабымнан көшірілді. Осыдан кейін  бірден фильмді түсіруші мен тапсырыс берушіге авторлық құқығым бұзылғаны туралы хаттар жаздым. ҚР Мәдениет министрлігі мен "Қазақфильм" АҚ-ның бірлескен жауабында кітап пен фильмдегі сәйкес келетін тұстар аз және кездейсоқ екені айтылған", - дейді автор.

Ол Мәдениет министрлігінің жауабы шындыққа жанаспайтынын айтты. 

"Мысалы, менің кітабымдағы ерекше сөз тіркесі "Хватит слов!” фильмде үш рет айтылады. Ал менің шығармамдағы Кирдің сақ тайпаларына арналған "Я сотру их с лица земли" деген жеке сөйлем фильмде екі рет қолданылған. Менің жұмысымнан көшірілген мұндай тіркестер көп. Олардың барлығы қосымшада ұсынылған. Спаргапистің ұлы 3 жасында ат үстінде отырғанда және 4 жасында садақ тартқанда, менің кітабымнан ерекше үзінді фильмдегі үш көріністе бар. Менің еңбегімнен осындай ондаған көріністер алынған", - деп атап өтті автор.

Ол соттан жауапкерлерден талапкердің пайдасына моральдық және материалдық залалды өндіріп алуды сұрайды.

Талап етілген сома – 50 миллион теңге.

Орымбетов өз сөзінің шындық екенін дәлелдеу үшін Нұрсұлтан Назарбаевқа жолдаған хатты және оның көмекшісімен фильм түсіру туралы телефон арқылы жүргізілген келіссөзді ұсына алатынын жеткізді.

"Томирис" – режиссер Ақан Сатаевтың сақ патшайымы мен Ұлы Кир туралы баяндайтын қазақстандық көркем фильмі. Фильмнің премьерасы 2019 жылдың қыркүйегінде өтті.

Продюсері – Әлия Назарбаева.

"Қамшы" сілтейді

Қате тапсаңыз, қажетті бөлікті таңдап ctrl+enter басыңыз.

Пікір қалдыру

пікір