13 Шілде, 2022 NEWS Өзгерту

Білім беру гранты конкурсына құжат қабылдау басталды: Қайда грант көп? Кімге жеңілдік қарастырылған?

Фото: kaznu.kz

Елде білім беру гранттарын тағайындау конкурсына қатысуға құжат қабылдау басталды. Қабылдау жоғары оқу орындарының қабылдау комиссиялары арқылы жүзеге асырылатын болады. Алыс аймақтарда тұратын талапкерлердің ыңғайы үшін жоғары оқу орындарында виртуалдық қабылдау комиссиялары жұмыс істеп, талапкерлерге бейне байланыс арқылы кеңес беріледі. Бұл туралы Білім және ғылым министрлігі мәлім етті.

Биыл бакалавриатқа түсу үшін 73 мыңнан астам грант бөлініп отыр. Гранттардың басым бөлігі "Инженерлік, өңдеу, құрылыс салалары" білім беру бағдарлама топтарына бөлінген, олардың саны 17 794 грантты құрайды. Ал "Педагогикалық ғылымдарға" – 10 810 грант, "Ақпараттық-коммуникациялық технологиялар" саласына – 9 103 грант, "Жаратылыстану ғылымдары, математика және статистика" бағытына – 6 288 грант тиесілі. Осылайша, техникалық бағыттар бойынша мемлекеттік тапсырыстың үлесі 60%-ға дейін ұлғайған.

ҰБТ қорытындысы бойынша кемінде 65 балл жинаған талапкерлер ұлттық жоғары оқу орындарына, кемінде 50 балмен басқа жоғары оқу орындарына түсе алады. Бұл ретте "Педагогикалық ғылымдар" және "Құқық" білім беру салалары бойынша шекті балл кемінде 75 балл, "Денсаулық сақтау" − кемінде 70 балл, "Ауыл шаруашылығы және биоресурстар", "Ветеринария" – кемінде 60 балды құрайды.

Оқуға түсушілер 16 мамыр мен 5 шілде аралығында өткен ҰБТ-ның екі нәтижесінің біреуін конкурсқа ұсына алады.

Мемлекеттік білім беру гранттарын тағайындау конкурсына қатысуға құжаттарды электронды түрде тапсыру үшін талапкерлерге төмендегі құжаттар қажет:

жеке куәлік;
ҰБТ сертификаты;
3х4 көлеміндегі фото;
орта білім туралы аттестат (техникалық және кәсіптік білім беру (ТжКБ) ұйымдарының түлектері үшін диплом);
№ 075/у нысанындағы медициналық анықтама және № 063/у нысанындағы профилактикалық екпелер картасы;
ер жігіттер үшін әскери тіркелу куәлігі;
жеңілдетілген санат бойынша конкурсқа қатысу үшін растайтын құжаттар.

Егер талапкер "Алтын белгі" иегері немесе отансүйгіштік және белсенді азаматтық ұстанымы үшін ерекшелік белгісімен марапатталған болса, онда ол басқа үміткерлермен балдары тең болған жағдайда басым құқыққа ие болады. Олимпиадалар мен спорттық жарыстардың жеңімпаздары үшін де осындай басымдылық қарастырылған.

Биыл алғаш рет халық тығыз орналасқан және батыс өңірлерінің жастарының жетекші жоғары оқу орындарында оқуға арналған мақсатты білім беру гранты бағдарламасы іске қосылып отыр. Бұл Атырау және Маңғыстау облыстарының 10 мың талапкеріне жоғары оқу орындарында білім алу үшін мақсатты гранттар алуға мүмкіндік береді.

Сонымен қатар биыл халықтың әлеуметтік осал топтарына бөлінетін гранттар саны көбейтілген. Кәмелетке толмаған төрт және одан көп бала тәрбиелеп отырған отбасылардағы балалар үшін гранттардың жалпы санының 5%-ы, кемінде үш жыл толық емес отбасы мәртебесі бар отбасылардан шыққан балаларға – 1%, І, ІІ топтағы мүгедек балаларды тәрбиелеп отырған отбасылардан шыққан түлектерге білім беру гранттарының 1%-ы көзделген. Жетім балалар және ата-анасының қамқорлығынсыз қалған балалар мен I, II топтағы мүгедектер, бала кезінен мүгедектер, мүгедек балалар арасынан шыққан азаматтар үшін квота гранттар санының 1%-ын құрайды. Жыл сайын Қазақстан Республикасының азаматы болып табылмайтын ұлты қазақ адамдарға (қандастарға) гранттардың 4%-ы беріледі.

Білім беру гранттарын тағайындау конкурсына қатысуға құжат қабылдау 20 шілдеге дейін жалғасады.

"Қамшы" сілтейді