01 Маусым, 2022 NEWS
Фото: sputnik.kz
Қазақстанда маймыл шешегін жұқтырған адам жоқ. Десе де денсаулық сақтау министрі Ажар Ғиният азаматтарға Африка елдеріне әзірге саяхаттамауға кеңес берді, деп жазады Sputnik Қазақстан сайты.
Министр ел шекарасвн кесіп өткен барлық адамның дене қызуы тексерілетінін атап өтті. Егер температурасы болса, дереу оқшауланып, жұқпалы аурулар ауруханасына жеткізіледі.
– Біз маймыл шешегін анықтау үшін диагностика дайындадық. Бұл – арнайы тестер. Олар осы ауруды анықтауға көмектеседі. Маймыл шешегінің белгілері бар пациенттерді тексереміз, – деді Ғиният үкімет кулуарында.
Министрдің айтуынша, Дүниежүзілік денсаулық сақтау ұйымы қазақстандықтарды осы ауруға қарсы вакциналау туралы ұсыным бермеген. Сондықтан бұл мәселе күн тәртібінде тұрған жоқ. Министр маймыл шешегі алғаш Африка елдерінен таралғанын, қазір ол жақта жағдай ушығып тұрғанын жеткізді.
– Қазақстан азаматтарына ауру көп тараған елдерге, әсіресе, Африка елдеріне саяхат жасауды шегере тұруға кеңес беремін, – деді ол.
Маймыл шешегінің негізгі белгісі – денеде бөртпе пайда болады. Бұған қоса, қызу көтеріліп, бас ауырады, әлсіздік сезіледі.
Қате тапсаңыз, қажетті бөлікті таңдап ctrl+enter басыңыз.
Пікір қалдыру
пікір