17 Мамыр, 2021 Әлем Өзгерту
Фото: аljazeera.com
Газа Секторындағы Палестина-Израиль қақтығысы басталған бір аптада 200-ге жуық адам қаза тапқан, олардың 58-і бала, деп жазады аljazeera.com сайты.
Дүйсенбіде Израиль әскерилері кезекті әуе шабуылын бастады. Жарылыстар Газа қаласын солтүстіктен оңтүстікке қарай қиратып келеді. Бұл 42 адамның өмірін қиған жексенбідегі шабуылдан да жойқын екені хабарланып жатыр.
Израиль әскері әуе шабуылы кезінде ХАМАС тобының (Газа Секторын бақылап отырған кей мемлекеттер лаңкестік топ деп таныған ұйым) 15 шақырымдық жерасты жолы мен ХАМАС командирлерінің 9 үйі жойылғанын мәлім етті.
Екінші аптаға жалғасып жатқан Газа Секторындағы қақтығыстың алғашқы аптасында Секторда 192 адам, оның ішінде 58 бала, 34 әйел қаза тапқан.
ХАМАС тобының Израильдің Амкелон, Беэр-Шева қалаларын атқылауының салдарынан 10 адам, оның ішінде 2 бала қаза тапқаны хабарланған.
Жексенбіде БҰҰ Қауіпсіздік кеңесі жиналып, Сектордағы жағдайға байланысты бір мәмлеге келе алмады. Қытай кеңестің бірауыздан мәлімдеме жасауына АҚШ кедергі келтірді деп отыр.
Аljazeera дерегінше, қақтығыс басталғалы 366 бала жарақат алған.
Сектордағы қақтығысқа бірнеше араб отбасын Шығыс Иерусалимнен басқа шаққа көшіру туралы сот шешімі себеп болған. Сот шешімі кейінге қалдырылғанымен қақтығыс тоқтамады.
Иерусалим 1967 жылғы Алты күндік соғыстан кейін Израиль бақылауында. Алайда халықаралық қауымдастық қаланың тұтас Израильге тиесілі екенін мойындамаған. Қала бірнеше бөлікке бөлінген. Қаланың Шығыс бөлігінде арабтар тұрады. Израиль билігі Шығыс Иерусалимде тұратындарға ел азаматы атану құқығын берген. Бірақ ол жердегілердің басым көпшілігі резидент ретінде тұрып келеді.
Газа Секторы заң жүзінде тәуелсіздігі ішінара мойындалған Палестина мемлекетінің бір бөлігі болып саналады. Шығысы мен солтүстігі Израильмен шектесіп жатыр. Ел кей мемлекеттер лаңкестік топ деп таныған ХАМАС тобының бақылауында.
Палестина заң жүзінде тәуелсіз мемлекет. Бірақ оның тәуелсіздігін БҰҰ мемлекеттерінің барлығы бірдей мойындамаған. Қазақстан Палестинаның тәуелсіздігін мойындаған. Елде шын мәнінде егемендік нақты құрылмаған. Мемлекеттік құрылымдар ішінара ғана жасақталған. Мемлекеттің президенті, үкіметі мен парламенті болғанымен, әскері, ұлттық валютасы, халықаралық әуежайы жоқ.
Ілмек сөздер:
Газа Секторындағы қақтығыс
Қате тапсаңыз, қажетті бөлікті таңдап ctrl+enter басыңыз.
Ұсынылғандар
Көп оқылғандар
Пікір қалдыру
пікір