Павлодар облысында 1358 адам жүргізуші куәлігінен айырылды

Өңірде 53 мыңнан астам жол қозғалысы ережелерінің бұзушылығы анықталды деп хабарлайды Qamshy.kz ақпарат агенттігі pavlodarnews.kz сайтына сілтеме жасап.

Облыстық полиция департаменті баспасөз қызметінің мәлімдеуінше, департаменттің басшысы полиция генерал-майоры Амантай Әубәкіров кезекті халықпен есеп беру кездесуін өткізді. Кездесу барысында ақырғы 4 жылда қылмыстылықтың тұрақты төмендеуін атап өтті.

Полиция іс-қимылының басымды бағыттарының бірі есірткі қылмысымен күресу болып табылады, - деді департамент басшысы. – Биылғы 8 айда 149 есірткі құқық бұзушылығы, оның ішінде есірткі заттарын аса ірі көлемде сату және сақтауға байланысты 50 қылмыс анықталды. Есірткі заттарын алудың жалпы көлемі 102 келіні құрайды. Сондай-ақ облысымызда браконьерлік мәселе де өзекті болып табылады. Биыл рейдтік іс-шаралар өткізу нәтижесінде табиғатты қорғау заң саласында 42 қылмыстық және 580 әкімшілік құқық бұзушылық анықталды. 4,5 миллион теңгеге айыппұл салынды.

Ведомство басшысы өз баяндамасында облыс жолдарындағы жағдайларға да қысқаша тоқталып өтті.

Бұл салада біз 53 мыңнан аса жол қозғалысы ережелерінің бұзушылығын анықтадық, - деді Амантай Әубәкіров. – 1358 құқықбұзушы жүргізуші куәлігінен айырылды. Алкогольдік мас күйде 1361 жүргізуші ұсталды. Оның 201-і әкімшілік қамауға алынды. 586 миллион теңге көлемінде айыппұл салынды.

Сонымен қатар, бүгінде одорологиялық зертхана өзінің оң нәтижелерін көрсетуде. Қызметтік иттердің көмегімен иіс пен іздерді пайдалана отырып, арнайы криминалистикалық зерттеулер жүргізілуде. Олардың көмегімен 2 кісі өлтіру, 2 тонау қылмысы ашылды.

Ең өзекті мәселе – қауіпсіздік саласын сандық жүйеге көшіру, - деді департамент басшысы. – Павлодар қаласында бейнебақылау Жедел басқару орталығының 117 камерасы арқылы жүзеге асырылады. Екібастұз, Ақсу және облыс аудандарының кезекші бөлімдерінде 130 бейнебақылау камералары қызмет етеді. Ағымдағы жылдың 8 айы ішінде олардың көмегімен 100-ден аса қылмыс ашылып, 19 мың әкімшілік құқық бұзушылық анықталды.