Интернет-конференция: Амангелді ӘБДІХАЛЫҚ

Интернет-конференциямыздың кезекті қонағы - белгілі қажылық сапарын ұйымдастырушы, «Нұр-Қазақстан» қажылық компаниясының президенті, философия ғылымдарының кандидаты, доцент, көптеген ғылыми еңбектердің авторы Амангелді Еренғайыпұлы.

Ол  қажылықта 74 мәрте (20 үлкен қажылық, 54 умра) болған. Осы уақытқа дейін 10 мыңнан астам Қазақстан қажыларын Сауд Арабиясына алып баруға жетекшілік етті. 2007 жылы Сауд Арабиясы шейхтарының қолынан Қағбаның алтынмен жалатылған жазуы бар кисуәсын (жамылғысын) сыйлыққа алды. Ал, 2008 жылы Қасиетті Қағбаның ішіне кіріп, дұға тілеу мүмкіндігіне ие болды. 2009 жылы «әл-Ақса мешітінің тарихы» еңбегі Палестинада жоғары бағаланып, әл-Ақса мешітінің бас имамы Шейх Мұхаммедтің қолынан «Қуббатус-Сахра» мешітінің алтын күмбезінің бір бөлігі бейнеленген ескерткіш сыйға берілді. 2010 жылы екінші рет Қасиетті Қағбаның ішіне кіріп, дұға тілеу мүмкіндігіне ие болды және Сауд Арабиясы шейхтарының қолынан екінші рет Қағбаның кисуасын сыйға алды. 2011 жылы халықтар арасындағы бірлік пен ынтымақтастықты нығайта отырып, имандылық саласында жүргізген еңбегі үшін Халықаралық «Ата Түрік» атындағы алтын медальмен марапатталды. 2012 жылы Палестина өлкесі, Иерусалим қаласындағы «Әл-Ақса» академиясының құрметті профессоры атағы берілді. 2013 жылы БҰҰ атынан «Қоғам алдындағы еңбегі үшін» алтын медалімен марапатталып, бұған қосымша «Бейбітшілік миссиясының елшісі» деген дипломатиялық атаққа ие болған. 2014 жылы БҰҰ «Адам құқығын қорғау комитеті» атынан, ерлігі үшін берілетін «Алтын қыран» төс белгісімен марапатталды. 2015 жылы Амангелді қажының бастауындағы «Нұр-Қазақстан» қажылық компаниясы Ұлттық бизнес-рейтинг бойынша ТМД елдерінде алғаш рет «Сала жетекшісі» атанды. Осыған байланысты Амангелді Еренғайыпұлына Мемлекеттік экономиканы дамыту және Қазақстанның халықаралық беделін нығайту саласында Отан алдында ерен еңбек еткен тұлғаларға  берілетін «Даңық жұлдызы. Қазақстан экономикасы» ордені берілді.

Мәртебелі, оқырман! Амангелді Еренғайыпұлына қояр сауалыңыз, бөлісер ойларыңыз болса, мархабат!