Петр Порошенко: Украина территориясына кірген Ресей әскери көліктерінің көзін жойдық

«Украина Президенті Петр Порошенко Украина территориясына түн ортасында басып кірген Ресей әскери көліктерінің Украин артиллериялары жағынан талқандалғанын мәлімдеді»,- деп хабарлайды «Хаффингтон Пост» кешегі ақпаратында.

Украина президенті Петр Порошенко Британия премьер-министрі Дэвид Кэмеронмен телефондағы сөйлесуде Украина күштерінің Шығыс Украина шекарасынан баса көктеп кірген Ресей әскери көліктерінің көзін құртқанын айтқан. «Украина Президентінің ресми сайты да бұл деректі нақтылап отыр. Президент сайтының ақпараты бойынша, ақпарат сенімді және нақтыланған, себебі, бұл қақтығыста әскери көліктердің дені Украин артиллериялары жағынан талқандалған»,- дейді ABC News. Ресейдің Украинаға басқыншылығын ертеден-ақ мөлшерлегенін айтқан НАТО бас хатшысы Андерс Фог Расмуссен: « Біз кеше түнде куә болған жағдай - бұрыннан-ақ біз көріп келе жатқан істердің табиғи жалғасы»,-деп отыр. Осыдан кейін, Ақ үй де осы жайында ескерту жасап, жақыннан бері Украинаға төнген қауіптің ұлғайып бара жатқанын жеткізді. Ал, Британия Ресей елшісін шақырып, Ресейдің Украинаға басып кіруі туралы түсініктеме беруін талап еткен. Еуроодақтың сыртқы істер министрлері де Ресейдің Украинаға жасаған әскери қимылдары халықаралық заңдарды көпе-көрнеу бұзғандық деп ескертіп отыр. Аталған жағдайдан кейін Украина жағы Ресей тарапынан келетін қауіптің асқынып келе жатқанын айтып, алаңдаушылық білдіргенін жазады Батыс ақпарат құралдары. Ал, Ресей тарапы бұл қақтығысты терістегенімен, Украина әскери күштерінің өклі Андрей Лысенко журналистермен болған брифингте Киев күштернің қараңғы түнде Украина шекарасынан баса көктеп кірген бір Ресейлік әскери көлікті тұтқындағанын паш етіп отыр. Украина шекарасындағы атыстарда Ресейлік қарулардың көптеп қолданылғандығын, қолданылған қарулардың ішінде Малайзиялық MH17 жолаушылар ұшағын атып түсірді делінген «Бук» зенитті зымыран кешенінің де бар екендігін жазады Британдық « The Guardian» ақпараты.

Санат Наққазақ