Облыстық ассамблея кеңесінің отырысы өтті

Бүгін аймақ басшысы, облыстық ҚХА төрағасы Ербол Қарашөкеевтің төрағалық етуімен Жамбыл облыстық Қазақстан халқы ассамблеясы кеңесінің отырысы өтті.

Кеңес жұмысына ҚХА төрағасының орынбасары Лугмар Буларов, облыстық Қазақстан халқы ассамблеясының құрылым мүшелері және этномәдени бірлестіктердің жетекшілері қатысты.

Жиынның күн тәртібінде Қазақстан халқы Ассамблеясының ХХХІІІ сессиясы талқыланып, «Қоғамдық келісім» мекемесінің атқарған жұмыстары баяндалды.

Басқосудың алғы баяндамасын ҚХА төрағасының орынбасары Лугмар Харкиевич жасады. Ол өз сөзінде татулық пен келісімді, жалпықазақстандық бірегейлікті сақтау және этносаралық қатынастарды нығайту жолындағы Ассамблея жұмыстарына тиімді де тың бағыт-бағдар берді.

Алқалы жиында өңірдегі этносаралық татулық пен қоғамдық келісімді сақтау, облыстық ассамблеяның қызметін жандандыру және оның қоғамдық-саяси рөлі мен маңызын арттыру бағытында атқарылып жатқан жұмыстар туралы облыстық «Қоғамдық келісім» мекемесінің басшысы Мубарак Жинақбаева баяндама жасап, мекеменің алдағы жоспарларымен бөлісті.

Мубарак Қасымқызы этносаралық қатынастарды дамытуда республикалық және облыстық жобаларды жүзеге асырып отырған өңірлік ҚХА құрылымдары – «Ассамблея жастары» РҚБ, Ақсақалдар мен Аналар кеңестері, Медиация кабинеті, Ғылыми-сараптамалық тобының көп қырлы қызметі туралы мәлімдеді.

Өз кезегінде сөз алған «Днепро» Украин этномәдени орталығы» қоғамдық бірлестігінің мүшесі Тарас Леоненко жастарды мемлекеттік тілді игеруге шақырды: – Қоғамның бірлігі үшін аса қажет әлеуметтік мәселе – мемлекеттік тілді игеру. Ассамблея — тура осы механизмді халыққа тарататын, әрбір өкілге жеткізетін, өзге ұлттарға ұғындыра білетін ұйым. Президентіміз Қасым-Жомарт Тоқаев қазақ тілі – азаматтық интеграцияның тиімді құралы, мәдени-рухани тұтастықтың жарқын көрінісі екенін айтты. Сондай-ақ, қазақ тілі ғылыми прогресс пен білімнің озық жетістіктеріне жол ашатын құралға айналуы керегін атап өткен болатын, – деді Т.Леоненко.

Күн тәртібінде көтерілген мәселелер бойынша Жамбыл облыстық «Өзбек ұлттық мәдени орталығы» қоғамдық бірлестігінің төрағасы Бахром Муминов, «Ордабасы» командалық ойынының Қазақстандық федерациясы» РҚБ президенті Руслан Исмазов та тақырыптық баяндамаларын жасады.

Кеңес отырысын қорытындылаған аймақ басшысы Ербол Шырақпайұлы Мемлекет басшысы Қасым-Жомарт Кемелұлының Қазақстан халқы Ассамблеясының ХХХІІІ сессиясында берген тапсырмалары Жамбыл облысында сапалы орындалуы қажеттігіне тоқталды.

Сонымен қатар, өңірде этносаралық келісім мен тұрақтылықты сақтау, мемлекеттік тілді насихаттау және жастарды қоғамдық-мәдени өмірге тарту бойынша жүргізілетін жұмыстар жүйелі және сапалы болу керектігін де атап өтті.