12 Наурыз, 2024 Барлық аймақтар
"Астанадағылар – бай, Оңтүстіктегілер – кедей"
Қазақстандағы халық табысы ең аз өңірлерге Оңтүстіктегі бес өңір кіреді.
![](/media/2024/03/12/crop-0_4_411x731_221.png?width=600&height=480)
фото: ҚР СЖРА Ұлттық статистика бюросы
finprom.kz. мәліметінше, 2023 жылдың үшінші тоқсанында қазақстандықтардың ақшалай табысы жан басына шаққандағы орташа есеппен 298,2 мың теңгені құрады, бұл 2022 жылдың үшінші тоқсанымен салыстырғанда бірден 21,5% көп. 2023 жылдың екінші тоқсанымен салыстырғанда үй шаруашылықтарының табысы 5,1% өсті.
Салыстыру үшін: бір жыл бұрын жеке табыс өсімі бір жылда 16,5%, бір тоқсанда 3,1% құрады. Бұл ретте инфляция деңгейі 2023 жылдың үшінші тоқсанында жылдық мәнде 12,9% және өткен тоқсанмен салыстырғанда 1,7% болды.
Қазақстанның 20 өңірінің 9-да табыс орташа республикалық деңгейден жоғары. Ең жоғары көрсеткіш Астанада: орта есеппен жан басына шаққанда 430,3 мың теңге — бір жыл бұрынғыдан 27% артық.
Алматы қаласы екінші орынға шықты, онда халықтың табысы бір жылда 34,1% өсіп, 392,1 мың теңгені құрады. Үздік үштікті Қарағанды облысы аяқтады: бір адамға 379,7 мың теңге, бір жылда 14,2% өсті. Алғашқы бестікке Шығыс Қазақстан (361,4 мың теңге) және Ұлытау (353,3 мың теңге) облыстары да енді.
Халықтың табысы ең төмен Түркістан облысында: жан басына шаққанда 212,5 мың теңге — 2022 жылдың үшінші тоқсанымен салыстырғанда 35,8% көп. Одан кейін Жамбыл облысы (213,7 мың теңге), Шымкент (221,8 мың теңге), Қызылорда (226,3 мың теңге) және Жетісу (227,9 мың теңге) облыстары.
Халық табысының құрылымында 75%-ға жуығы еңбектен түскен табыс: 223 мың теңге — 2022 жылдың үшінші тоқсанымен салыстырғанда 23,6% артық. Оның 193,6 мың теңгесі жалдамалы жұмыстан, 29,4 мың теңгесі өзін-өзі жұмыспен қамтудан және кәсіпкерлік қызметтен түскен табыс.
Табыс құрылымында әлеуметтік аударымдар 63 мың теңгені құрап, бір жылда 14,3% өсті. Оның ішінде зейнетақы — 50,2 мың теңге, жәрдемақы — 11,5 мың теңге, шәкіртақы — 1,1 мың теңге, АӘК және тұрғын үй көмегі — жан басына орташа есеппен 198 теңгені құрады.
Туыстары мен жақындарынан түскен материалдық көмек, сондай-ақ алимент бір жыл ішінде 24,4% өсіп, 6,9 мың теңгені құрады. Өзге табыстар 5,2 мың теңгені құрады, оның 1,4 мың теңгесі меншік табысы, 3,8 мың теңгесі басқа да ақшалай түсімдер.
Қате тапсаңыз, қажетті бөлікті таңдап ctrl+enter басыңыз.
Ұсынылғандар
Пікір қалдыру
пікір