Фото: Ашық дереккөз
Қасым-Жомарт Тоқаев әлеуметтік желіде тараған "2026 жылы тағы да сайлауға қатысады" деген ақпаратты жоққа шығарды. Президенттің айтуынша, бұдан кейін заңға оңды-солды өзгеріс енгізілмейді.
"Осындай маңызды мәселеге келгенде, тіпті мүмкін емес. Мен бұған нық сенімдімін. Конституциялық реформа Ата заңға қалай болса солай өзгеріс енгізе беру үшін жасалған жоқ.
Президент лауазымына бір-ақ рет сайлану туралы ереже енді ешқашан өзгермейді. Бұл талап мемлекетіміздің тәуелсіздігі, біртұтастығы, аумақтық тұтастығы және басқару нысаны туралы нормалар сияқты мызғымастай етіп бекітілген", деп жауап берді президент.
Тоқаев жетіжылдық мерзім туралы идеяны 15 жыл бұрын да түрлі жабық пікірталастарда айтып жүргенін еске алды.
"Сол кезде ұсыныс аса қолдау таба қоймады. Өзім Президент болып сайланғаннан кейін, осы бастамамның артықшылығы мен кемшілігін әбден салмақтап, оны қалай жүзеге асыруға болатыны жөнінде көп ойладым.
Суперпрезидентке тән өкілеттіктерді жою үшін 2022 жылы Конституцияға бірқатар маңызды өзгеріс енгізілді. Мен сол кезде жетіжылдық бір мерзім идеясын қайта ұсындым. Бастамама бүкіл халық қолдау білдірді. Осымен бұл әңгіме тәмам", деді Қасым-ЖомартТоқаев.
Қате тапсаңыз, қажетті бөлікті таңдап ctrl+enter басыңыз.
Пікір қалдыру
пікір