"Дикий Арманның" ұсталуына қатысты тың ақпарат жарияланды

Жуырда Алматыда арнайы операция барысында ұсталған Арман Жұмагелдиев сот шешімімен 2 айға қамауға алынды. Бұл туралы Нұр-Сұлтан қалалық сотының баспасөз қызметі хабарлады.

"Нұр-Сұлтан қаласы мамандандырылған ауданаралық тергеу соты күдікті Арман Жұмагелдиевке қатысты 2 ай мерзімге қамауда ұстау түрінде бұлтартпау шарасын санкциялады",  делінген хабарламада.

Сотқа дейінгі тергеудің өзге мәліметтері ҚПК 201-бабына (Сотқа дейінгі тергеп-тексеру деректерiн жария етуге жол бермеу) сәйкес жария етілмейді.

Айта кетейік, Арман Жұмагелдиев көпшілікке "Дикий Арман" лақап атымен танымал.

7 қаңтарда Алматыдағы арнайы операция барысында "Дикий Арман" бастаған ұйымдасқан қылмыстық топтың 6 мүшесі ұсталған.

Қылмыскерлерден түрлі марка мен калибрлі 4 жартылай автоматты тапанша, оқ-дәрі, суық қару мен броньдалған көлік тәркіленген.

"Дикий Арманды" ұстау сәтінің суреттері әлеуметтік желіде жарияланды. Бейресми ақпараттарға сүйенсек ұстау операциясы қонақүйлердің бірінде болған.