"Мен екіжүзді болып өмір сүргім келмейді". Ахметбек Нұрсила партия құрмақ

Кәсіпкер, бизнес-тренер, Бизнес бастау кәсіпкерлік мектебінің жетекшісі Ахметбек Нұрсила саяси партия құратынын мәлім етті. Ол бұл туралы facebook парақшасында хабарлады.

Кәсіпкер өзінің оқығаны, тоқығаны бар екенін айтып, бұнысы қара басының қамынан аспаса, онда "аты өшкір" болғаным ғой" дей келе, бұған дейін тындырған істері туралы айтып өтті.
⠀
"Оқығаным, білгенімді халықтың игілігіне жарату үшін депутаттыққа барсам деген ойым бар. Мен не білемін?
⠀
1. 1982 жылдан бастап өндіріс орындарында істедім. Қарапайым ұстадан цех бастығына дейін көтерілдім;
⠀
2. 1991 жылдан бастап кәсіптемін. Шұжық өндіру, тон өндіру, жиһаз өндіру, қымыз өндіру салаларында істедім. Таксопарк, түйе, жылқы өсіру саласында біраз сәтсіз жобаларым да болды;
⠀
3. Италиян, Түрік кәсіпкерлерімен тығыз байланыста болдым. Америка, Канада елдерінен мықты кеңесшілерден сабақ алдым;
⠀
4. Экономика саласын жақсы көріп оқимын, түсінемін;
⠀
5. Кейінгі 5 жыл кәсіпкерлерді дайындаумен айналысып жүрмін.
⠀
Осы жинаған білімдерім мен тәжірибелерім маған "парламентке" барып, еліміздің дамуына жақсы әсерін беретін заңдарды қабылдауға септігі тиеді деп ойлаймын.
⠀
Әрине саясат саласында сондай білімім жоқ. Және де саясат мені сондай қатты қызықтырмайды да. Кезінде Ғалымжан Жақиянов досымның өтінішімен ДВК-ның митингілерінде сөйлегенім рас. Ол азаматты мен сыйлаймын, қазақтың рухы сынбаған бір батыры деп санаймын. Бірақ саяси көзқарасымыз бірдей емес. Маған елдің тыныштығы, берекесі керек" деп жазды Ахметбек Нұрсила.
⠀
Ол бүгінде "президент дұрыс бағыт ұстанып, халықтың көңілінен шығатын іс-әрекеттер жасап жатыр" деп санайды. Бірақ бәрі керемет болып кетті, "жасасын президент" деуден де аулақ.

"Ешқашан ТЖ (Табан жалағыш) болып көргем жоқ, қалған өмірімде бола қоймаймын деп ойлаймын. Керек кезінде өкіметті сынап, тексеріп, қателіктерін көрсетіп, халықтың талабын жеткізіп отыра алатыныма сенімдімін.
⠀
Сондықтан парламентке барып елімнің өркендеуіне септігімді тигізгім келеді. Бірақ ол үшін партия атынан түсуім керек. Бір партияның атынан баратын болсам, онда олардың айт дегенін ғана айтатын қол жаулық боламын ғой. Мен ондай болғым келмейді.
⠀
"Өз партиямды құрсам қалай болады" деп дос-таныстарымммен ақылдассам "Өле алмай жүрсің бе? Асфальтқа "закатать ете салады" деп қорқытады...
⠀
Мен ойлаймын "Неге мені асфальтқа "закатать" етуі керек?" Мен қандай елде өмір сүріп жатырмын? Ұрпағым қандай елде өмір сүреді сонда? "Қалғанша жарты жаңқам мен сенікі" деген Міржақыптардың, "Тірі болсам Қазаққа қызмет етпей қоймаймын" деген Әлиханның сөзін күндіз-түні айтамын. Ал, тірлігім мынау(((
⠀
Сонда мен кім болғаным? Олардың сөзін несіне айтып жүрмін? Осы ой талайдан бері мазалап жүр.
⠀
Мен партия құрсам мені қанша адам қолдайды деп ойлайсыздар? Сіз қолдайсыз ба?

Менің инста парақшама, ютуб каналыма "Қолдаймын" деп жаза салсаңыз және де егер шынымен менің партия құрып, халықтың сөзін сөйлейтін депутат болғанымды қаласаңыз дос-таныстарыңызға айтсаңыз. Олар да менің осы постыма, ютуб каналыма "Қолдаймыз" деп жаза салса. Егер де шынымен халық қолдаса, онда мен бел шешіп кірісемін.

Құрметпен Ахметбек Нұрсила!" делінген кәсіпкер жазбасында.