Айт намазының алдында қандай амалдар жасау керек?

Айлардың сұлтаны — Рамазаннан кейін мұсылман қауымының айтулы мерекесі айт басталады. Айттың бірінші күні таңда айт намазы оқылады. Qamshy.kz ақпарат агенттігі ummet.kz сайтының дерегін негізге ала отырып, айт намазы басталмас бұрын қандай амалдар жасау керектігін оқырмандар назарына ұсынады.

Пайғамбарымыздың (ﷺ) көрсетіп кеткен төмендегідей амалдарын істеу сүннет болады:

Пітір садақасын беру. Ай бойы пітір садақасын беруге үлгірмеген кісілер болса, айт намазынан бұрын беру керек. Одан кейін берілсе ол пітір садақа болып саналмайды.

Ғұсыл алу. Жуынғанда тұтас денеге су тиюін қадағалаған дұрыс. Жеткілікті сумен ауыз қуысын, мұрынды да шаю керек.

Мисуак қолдану. Айт намазы оқылатын мешіттер әлеуметтік орын болғандықтан ауыз қуысының тазалығыне мән беру керек. Бұл мұсылманның сипаттарының бірі. Пайғамбарымыздың (ﷺ) әрдайым қолданған мисуак тұтынған. Бұл - сүннет амал. Алайда, мисуак болмаған жағдайда тіс пастасы, щеткасын да қолдансаңыз құба-құп.

Жақсылық жасау. Басқаларға рухани-материалдық қол ұшын беру, көмек көрсету. Сонымен бірге айт намазына жеткізіп салу, тіпті айналаңыздағы адамдарға жылы сөз сөйлеп, ашық қабақ, жылы шырай таныту да жақсылық саналады.

Ең тәуір әрі таза киім кию. Жаңа немесе таза, үтіктеп, жарасымды, үйлесімді киім киіп барған абзал.

Намазға ерте бару. Шариғи тұрғыда ерте келу көп сауапқа себеп болатын болса, қала берді бұл дағдының жеке тұлғаның дамуына да пайдасы орасан. Көбірек Құран тыңдап, уағызын естуге, айт намазына үлгеріп, соңынан хұтбаны да толық тыңдауға мүмкіндік аласыз.

Құрма жеп шығу. Алла Елшісі (ﷺ) ораза айт намазына шығардан бұрын үйінен саны тақ болатындай (1, 3, 5, ...) құрма жеп шығатын болған.

Мешітке барар жолда тәкбір айту. Раббымызға «Аллаһу әкбар(Алла ұлық)» деген сияқты мадақ-зікірлер айтқан жөн.